И.Д.Вязов çуралнăранпа 100 çул çитнине халалланă «Иван Димитриевич Вязов – сумлă таврапĕлÿçĕ» уяв иртрĕ.

Юпа уйăхĕн 1-мĕшĕнче Чуманкассинчи вăтам шкулта И.Д.Вязов çуралнăранпа 100 çул çитнине халалланă «Иван Димитриевич Вязов – сумлă таврапĕлÿçĕ» уяв иртрĕ.

Чăваш Республикин Пуçлăхĕ Олег Николаев 2022-мĕш çул Чăваш Енре паллă ентешсен çулталăкĕ тесе палăртнă. Пирĕн тăван енре те маттур та пултаруллă çынсем пур. Вĕсенчен пĕри – педагог, вăрçăпа ĕç ветеранĕ, таврапĕлÿçĕ, халăх академикĕ, Муркаш районĕн Хисеплĕ гражданинĕ И.Д.Вязов.

Юпа уйăхĕн 1-мĕшĕнче Чуманкассинчи вăтам шкулта И.Д.Вязов çуралнăранпа 100 çул çитнине халалланă «Иван Димитриевич Вязов – сумлă таврапĕлÿçĕ» уяв иртрĕ. Çак уява Муркаш район администрацийĕн вĕренÿ, çамрăксен политикин тата физкультурăпа спорт пайӗн ертӱçи З.Ю.Дипломатова, районти Депутатсен Пухăвĕн председателĕ А.В.Иванов, Муркаш районĕнчи агропромышленность комплексĕн ветерансен совечĕн председателĕ, Чăваш наци конгресс президенчĕн советникĕ В.И.Вязов, Чăваш наци конгресĕн вице-президенчĕ тата «Ырă кăмăллăх» фончĕн ертуçи П.Н.Вязав, таврапĕлÿçĕ, Чăваш наци ăслăлăхпа ÿнер академийн президенчĕ Е.Е.Ерагин, И.Д.Вязовăн ачисем, тăванĕсем, учительсем, шкул ачисем хутшăнчĕç.

Килнĕ хăнасем Иван Димитриевич пурнăçĕпе ĕçĕсем çинче чарăнса тăчĕç, педагогика ĕçĕн ветеранĕсем пĕрле ĕçленĕ самантсене аса илсе каласа пачĕç. Таврапĕлÿçĕ ачисем ашшĕ илемлĕ, пуян чунлă, ăста педагог пулнине палăртрĕç. Чуманкасси ял библиотекин библиотекарĕ Зоя Ивановна Иванова И.Д.Вязов кĕнекисен выставкипе паллаштарчĕ. Культура ĕçченĕсем, вĕрентекенсем, шкул ачисем юрă-ташăпа савăнтарчĕç. Ватă çынсен кунĕпе саламласа Атапай Культура Çурчĕ çумĕнчи «Сурпан» вокал ушкăнĕ илемлĕ юрăсем парнелерĕ.

Иван Димитриевич Вязов паянхи кун та пирĕн асрах. Вăл пирĕншĕн пуриншĕн те тĕслĕх пулса тăрать. Пулас ăру та вăл пуçланă пархатарлă ĕçсене малалла аталантарса пырасса шанатпăр.