Март уйăхĕнче пурте кĕтекен мероприяти вăл - «Чăваш пики» конкурс. Сăлтавĕ те çук мар ĕнтĕ. Пĕлтĕрхи çул Чуманкасси шкул хĕрĕ Лариса Цветкова республика шайĕнче иртнĕ "Чăваш пики" конкурсра "Вице-пике" номинацире çĕнтерни пурне те савăнтарать, çĕнĕ çĕнтерÿ тума хавхалантарать.

Уява уçасси сцена çине конкурса ертсе пыракан Александр Смирнов тухнипе пуçланчĕ.  Пултаруллă каччă пухăннă ашшĕ-амăшне, вĕрентекенсемпе вĕренекенсене, пухăннă хăнасене уяв ячĕпе саламларĕ, конкурсантсене ăнăçу сунчĕ. Курма пынисем 5 конкурсанта тăвăллăн алă çупса кĕтсе илчĕç. 

Пултарулăх конкурсĕнче тупăшакансем хăйсемпе паллаштарчĕç, сăвă е юптару каласа, юрă юрласа, ташласа  ăмăртрĕç. Унсăр пуçне «Чăваш апат-çимĕçĕ», « Чăваш тумĕ», «Эпир - чăваш çамрăкĕсем», «Тĕрĕс хуравла»   конкурссем витĕр тухрĕç.

Пур конкурсант та мероприятие тĕплĕн хатĕрленнĕ, килти ĕçе аван пурнăçланă (чăваш апачĕ хатĕрлесси, ыйтусем çине хурав парасси). Уяв тăршшĕпех чăваш юрри-ташши янăрарĕ, çав самантра кашниех хăй чăваш пулнишĕн мăнаçланчĕ пуль тетпĕр.

Чи илемлине, чи хÿхĕммине, чи маттурине тупма жюри членĕсене питех те йывăр пулчĕ, мĕншĕн тесен конкурса чи-чи пуларуллисем хутшăннă. Çапах та жюри номинацисене çапла пайларĕ:

«Чăваш пики»           - Емельянова Алена

«Чи пултаруллă пике»    - Алексеева Анастасия.

«Чи ĕçчен пике     - Колосьева Ольга.

«Чи кăмăллă пике» - Смородинова Татьяна.

«Чи сăпайлă пике»      - Захарова Ангелина.

Курма килекенсем çак мероприятипе кăмăллă юлчĕç. Килес çул та «Чăваш пики» конкурса ирттерме палăртрĕç.